santacruznagreine a d’fhoilsigh | 23/11/2009

Seacláidí Árann agus Thanksgiving

Cheannaíos bosca seacláidí inniu mar bhronntanas i gcomhair Thanksgiving. Déardaoin an lá mór ach toisc gur féile gan mhaisiúcháin í seo, ní bheadh a fhios agat é agus tú ar do chamchuairt timpeall ar Santa Cruz. Ní gá puimpcíní ná crainn Nollag chun Thanksgiving a cheiliúradh. Bhí a fhios agam go raibh siopa seacláidí ar Mission Street, in aice le Bay Drive áit a gcasaim ar bhóthar na hollscoile ar mo rothar. Ní raibh a fhios agam go mbeadh scéal chomh suimiúil san sa tsiopa céanna.

Seacláidí Uí Dhonnghaile

Is le Richard agus Henry Donnelly an siopa beag seo, nach bhfuil cuma chomh galánta san ó lasmuigh air. Ach isteach leat agus bainfidh iontaisí na seacláide an leathadh as do shúile – agus as do chaincín leis. Spáinnis a bhí á labhairt ag fear an tí, Richard, leis an gcúntóir Meicsiceach, María, nuair a chuas an doras isteach. Hola, arsa mise leo, fonn Spáinnise orm i gcónaí. Mhínigh María praghas na mboscaí éagsúla dom (iad go léir daor go maith) agus an rogha a bhí agam idir leche, negro agus frutas variadas. Bhí miasanna móra lán seacláidí ar an gcuntar romham, gach aon bhlas faoin spéir orthu agus boladh cumhra milis uatha go léir.

Seacláidí blasta cumhra na Gaeltachta

Ansin a tháinig Richard i leith chugam, é lán ceisteanna faoi bhlas aduain mo chuid Spáinnise. Nuair a thuig sé gur Éireannach mé, thosaigh sé ag insint scéal a bheatha dom. Ba as Árainn dá athair críonna, fear crua a d’imigh ar imirce ó Eirinn i 1917 agus a chaith blianta ag obair ar na bildéalacha i Massachusetts. Anoir a tháinig an teaghlach ina dhiaidh sin, chomh fada le Santa Cruz. Isteach le Henry tríd an gcúldoras ansin, mias mhór seacláidí breá friseáilte ón oigheann á hiompar aige. Henry, this man knows the Aran Islands, a dúirt Richard leis. Bhíodar beirt an-sásta go raibh Éireannach istigh. Aon uair amháin a bhíodar in Árainn, agus in Éirinn, agus iad ina bpáistí beaga sna 1960í. Samhraidh triomaigh ab ea é agus b’éigean ciondáil uisce a chur i bhfeidhm i dtithe lóistín Árann. Ba chuimhin leo Dún Aonghusa agus na dúnta eile go maith, chomh maith le tráigh bhreá Chill Mhuirbhigh áit ar chaitheadar laethanta fada ag déanamh seoigh.

Richard ag meascadh na seacláide

Bhí an-suim acu a chlos gurb í an Ghaeilge a thug go Santa Cruz mé agus ba thrua leo gan í a bheith acu féin. And here I am chatting away in Spanish to María, a gháir Richard de gheit i lár abairte. Bhí rún acu filleadh ar Árainn arís toisc go raibh daoine muinteartha leo ag teannadh amach sna blianta ach ba bheag í a ndúil in eitiltí fada. B’ait leo a chlos go raibh Éire faoi uisce ag an ndrochaimsir ach bhí súil ach gur tháinig Árainn slán. Thug María dhá phaca oighir dom chun an bosca a choimeád breá fuar, friseáilte ar an dtraein ó dheas go LA, áit a mbeidh Thanksgiving á cheiliúradh againn le seacláidí na Gaeltachta.

Advertisements

Responses

  1. Hi, a John, is anois atá seans agam breathnú ar do bhlag breá agus caithfidh mé a rá gur thaitin an scéal seo faoi na seacláidí go mór liom, ní hamháin toisc gur andúileach seacláide mé fhéin ach toisc go bhfuil mé sásta go bhfuil tú ag castáil le muintir chairdiúil Árann agus tú ar an taobh eile den domhan! So, aon scéal agat? Tá súil agam go bhfuil tú go maith agus go bhfuil tú ag baint sult as an saol thall ann, sin an rud is tábhachtaí ar aon chuma! Tá muid tagtha chuig deireadh an tseimeastair anseo san ollscoil, deireadh leis na ranganna oíche so beidh saol agam arís! L’examen en francais s’approche et j’ai beaucoup d’études a faire! Il faut etre sensible maintenant je crois! Tabhair aire dhuit fhéin, níl an áit seo mar a chéile gan thú!!
    Bxx

    • Haigh a Bhelinda, an-deas cloisteáil uait. Scríobhfaidh mé chugat i gceart ar an ríomhphost go luath. John

  2. Tugaim faoi deara nach bhfuil m’ainm luaite leis an ráiteas sin, Belinda atá anseo!

  3. […] sinn go léir ag fanacht leis an vaicsín i gcoinne fliú na muc; cheannaíos bosca seacláidí ó María eile atá ag obair le Donnelly’s Chocolates tamall beag uaim agus caithim cúpla uair […]

  4. […] Asana. Bhí scéalta suimiúla faoi Éirinn – agus seacláidí fíorchostasacha – ar fáil ag Donnelly’s Chocolates ar Mission Street. Ar cheann de na pubanna ba réchúisí agus ba chompordaí ar an mbaile tá an […]


Freagra

Líon amach do chuid faisnéise thíos nó cliceáil ar dheilbhín le logáil isteach:

Lógó WordPress.com

Is le do chuntas WordPress.com atá tú ag freagairt. Logáil Amach / Athrú )

Peictiúr Twitter

Is le do chuntas Twitter atá tú ag freagairt. Logáil Amach / Athrú )

Pictiúr Facebook

Is le do chuntas Facebook atá tú ag freagairt. Logáil Amach / Athrú )

Pictiúr Google+

Is le do chuntas Google+ atá tú ag freagairt. Logáil Amach / Athrú )

Ceangal le %s

Ranganna

Molann %d blagálaí é seo: